734002, Таджикистан, Душанбе ул Спортивная 6 (+992 37) 2351023; 2367815;

Комитет по делам молодежи и спорта при Правительстве Республики Таджикистан

Меню


ВАРЗИШ САЛОМАТИИ АҲОЛИРО МУСТАҲКАМ ВА МИЛЛАТРО ДАР АРСАИ ҶАҲОН МУАРРИФӢ МЕСОЗАД. 10 август — Рӯзи варзишгарони Тоҷикистон

ВАРЗИШ САЛОМАТИИ АҲОЛИРО МУСТАҲКАМ ВА МИЛЛАТРО ДАР АРСАИ ҶАҲОН МУАРРИФӢ МЕСОЗАД. 10 август — Рӯзи варзишгарони Тоҷикистон

ДУШАНБЕ, 10.08.2020 /АМИТ «Ховар»/. Ҳамасола дар  ҷумҳурӣ 10 август Рӯзи варзишгарони Тоҷикистон таҷлил мешавад. Мақсад аз таҷлили ин рӯз тарғиби тарзи ҳаёти солим, оммавияти варзиш ва ҷалби  бештари наврасону ҷавонон ва аҳолии ҷумҳурӣ ба варзиш мебошад.  Ба ин муносибат хабарнигори АМИТ «Ховар»   бо  сардори Раёсати тарбияи ҷисмонӣ ва инкишофи варзиши Кумитаи кор бо ҷавонон ва варзиши назди Ҳукумати Ҷумҳурии Тоҷикистон Носир БОЗОРОВ  ҳамсуҳбат гардид.

«Таҷлили Рӯзи варзишгарон дорои таърихи ба худ хос буда, он имкон медиҳад, ки бори дигар ба соҳаи варзиш ва дастгирии варзишгарон таваҷҷуҳ равона карда шавад. Агар ҳарчи қадар ба рушди соҳаи варзиш шароит фароҳам оварда шавад, ҳамон қадар насли ҷавонро аз амалҳои номатлуб, ба монанди нашъамандиву нашъаҷаллобӣ, аъзо шудан ба гурӯҳҳои экстремистиву ифротгаро наҷот дода мешавад. Ин аст, ки  Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  имрӯз тамоми тадбирҳоро баҳри рушд додани соҳаи варзиш меандешанд, то ин ки  варзишгарони Тоҷикистон дар баробари мустаҳкам намудани саломатии худ дар арсаи байналмилалӣ мамлакати хешро муаррифӣ намуда, парчами ҷумҳуриро партавафшон намоянд. Он толорҳои барҳавое, ки аз тарафи Ҳукумати мамлакат ҳамасола ба истифода дода мешаванд, далели ин гуфтаҳо мебошанд»,- гуфт Носир Бозоров.

Ба андешаи номбурда, варзиш мактаби обутоби бадан ва мардонагӣ мебошад. Инчунин он омили муҳими ҷаҳоншиносии инсон, ба ҳамдигар муаррифӣ ва наздик гардидани халқу миллатҳо ва кишварҳои мухталифи ҷаҳон  маҳсуб мешавад. Беҳуда нест, ки Пешвои миллат варзишро аз василаҳои муҳими ҳифзу таҳкими  саломатии аҳолӣ, қосиди сулҳу субот, омили ташаккулдиҳандаи неруву тавоноии инсон  ва инъикоскунандаи  симои халқу миллат  дар арсаи ҷаҳон  номидаанд. Зеро варзиш дар ҳаёти ҳар инсон  аҳамияти аввалиндараҷа дошта, пайваста байни мардум, хусусан  миёни наврасону ҷавонон ташвиқ мешавад.

«Ғамхориҳои Пешвои миллат дар ҳаққи варзишгарон сабаби  устувор гардидани пойгоҳи моддию техникӣ барои оммавигардонии варзиш ва омода намудани варзишгарони касбии сатҳи ҷумҳурӣ ва байналмилалӣ гардид. Расман ифтитоҳ гардидани Қасри теннис ва Маҷмааи варзиши обии шаҳри Душанбе туҳфаи беназир барои варзишгарон ва мо, масъулини соҳа маҳсуб мешавад, зеро чунин шароит барои омода намудани варзишгарони касбӣ ва ташкилу баргузор намудани мусобиқаҳои бонуфузи сатҳи байналмилалӣ мусоидат менамояд. Ҳар боре ки Сарвари давлат дар вохӯрӣ бо варзишгарон сухан мекунанд, доимо зикр менамоянд, ки  «шумо дар майдони ҳарбу зарб барои муаррифӣ кардани давлату миллат мубориза мебаред, ҳеҷ гоҳ шумо худро танҳо фикр накунед ва эҳсос намоед, ки ман ва 9 миллион аҳолии Тоҷикистон дар бари шумо қарор дорем». Вақте ки ин суханҳо аз забони Пешвои миллат садо медиҳанд, мо, варзишгаронро водор месозанд, ки дар мусобиқаҳои сатҳи ҷаҳон ҳарчи беҳтару бештар қувваозмоӣ намуда, ҷойҳои намоёнро ишғол намоем»,-  изҳор медорад сардори Раёсати тарбияи ҷисмонӣ ва инкишофи варзиши Кумитаи кор бо ҷавонон ва варзиши мамлакат.

Ба зикри масъулини соҳаи варзиш, имрӯз дар ҷумҳурӣ намудҳои  футбол, бокс ва гӯштин хеле рушд карда, аз рӯи ин намудҳо варзишгарони тоҷик дар мусобиқаҳои ҷаҳонӣ Тоҷикистонро муаррифӣ намуда, парчамбардори ватану миллат гардидаанд.

 

Ба иловаи Носир Бозоров, роҳи пешгирии ҳама гуна бемориҳо варзиш буда, то имрӯз, хушбахтона,  ягон нафар варзишгари тоҷик гирифтори COVID-19   нагардидааст, ки ин аз пайваста ба варзишу обутоби бадан машғул будани онҳо дарак медиҳад.

Ҳоло бо мақсади чалби наврасону ҷавонон ба варзиш дар ҷумҳурӣ 128 мактаби варзишӣ амал менамоянд.

Холисаи АСОМИДДИН,
АМИТ «Ховар»


10.08.2020 Нет комментариев