(Дар мисоли соҳаи кор бо ҷавонон)

Ҷавонон. Ҳар гоҳе атрофи ин қишри созандаву неруманд ва ояндаи давлату миллат сухан меравад, ҳатман аз дастоварду тавонмандиҳояшон ибрози назар менамоянду фардои дурахшонро дар симои онҳо мебинанд. Ва барои он ки ҷавонон дар оянда ҳаёти хубе сохта, чун имрӯзиён таҳкимбахши сулҳу ваҳдат бошанд, имкониятҳои зарурӣ муҳайёст.

Пешвои миллат муҳтарам Эмомалӣ Раҳмон аз рӯзҳои аввали соҳибистиқлолӣ сиёсати давлатии ҷавононро дар маркази таваҷҷуҳ қарор дод. Дар ин самт то ба имрӯз тадбирҳои зиёде андешидаву амалӣ гардиданд, ки маншаи ҳамаи он аз таваҷҷуҳи ҳамешагӣ доштани пуштибону ғамхори ҷавонон муҳтарам Эмомалӣ Раҳмон аст.
Боиси хушҳолии кулли ҷавонони кишвар аст, ки дар интихоботи президентии ахир, ки 11 октябри соли 2020 баргузор гардид, мададгору ғамхори ҷавонони кишвар муҳтарам Эмомалӣ Раҳмон барои ҳафт соли оянда Президенти Ҷумҳурии Тоҷикистон интихоб гардиданд. Дар Барномаи пешазинтихоботии Президенти тозаинтихоби Тоҷикистон муҳтарам Эмомалӣ Раҳмон баробари дигар соҳаҳо дар самти сиёсати давлатии ҷавонон низ бахши алоҳида ҷой дошт.

Дар ин барнома вобаста ба ҷавонону сиёсати давлатии ҷавонон гуфта шудааст: “Мо аз рӯзҳои аввали соҳибистиқлолӣ ба масъалаи тарбияи ҳамаҷонибаи ҷавонон ҳамчун самти муҳимтарини сиёсати давлат диққати аввалиндараҷа дода, дар ҳафт соли оянда мақсад дорем, ки ташаббусҳои созандаи ҷавононро дастгирӣ карда, дар ин соҳа тадбирҳои зеринро амалӣ гардонем: бо мақсади боз ҳам таҳким бахшидани ҳувияти миллӣ миёни наврасон ва ҷавонони кишвар таҳия намудани барномаҳои нави тарбияи ватандӯстӣ; таҳким бахшидан ба заминаҳои меъёрии ҳуқуқии соҳа, аз ҷумла дар таҳрири нав қабул кардани Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон”, “Стратегияи миллии сиёсати давлатии ҷавонон” ва “Консепсияи миллии сиёсати давлатии ҷавонон”; зиёд намудани таваҷҷуҳи ҷавонон ба илмомӯзӣ, ихтироъкорӣ, навоварӣ ва бунёд кардани марказҳои инкишофи зеҳнии наврасону ҷавонон;

– бо дарназардошти манфиатҳои миллӣ тақвият бахшидан ба эҳсоси ватанпарастӣ, худшиносии миллӣ, таҳаммулгароӣ ва ҷаҳонбинии дунявӣ миёни ҷавонон;

– фароҳам овардани шароит барои боз ҳам бештар ҷалб кардани ҷавонон ба равандҳои фарҳангӣ, иқтисодӣ, илмӣ ва маърифатии байналмилалӣ”.

Коршиносони соҳа нуктаҳои муҳиме, ки вобаста ба ин самтро барои рушди соҳа боз ҳам мусоид мехонанд.

Илҳомҷон Ҳамидиён, мудири шуъбаи кор бо ҷавонони КИМ ҲХДТ мегӯяд, вақте сухан дар бораи нишондодҳои барномавии Президенти тозаинтихоби Тоҷикистон меравад, қабл аз ҳама, шиори номзад – “Барои рушди устувори иқтисодӣ ва зиндагии шоистаи мардум” пеши назар меояд. Дар Барномаи пешазинтихоботиашон Пешвои миллат дар 7 бахши мукаммалу фарогир рушди тамоми соҳаҳоро дар солҳои минбаъда ба инобат гирифта, дар бахши хоса тақвият додани сиёсати ҷавононро зикр мекунанд. Яъне дар доираи барнома таваҷҷуҳ намудан ба масоили ҷавонон ва сиёсати давлатии ҷавонон ҳамчун низоми ягонаи тадбирҳои иҷтимоию иқтисодӣ, фарҳангӣ, ташкилӣ, ҳуқуқӣ ва тарбиявӣ бояд ба маъное фаҳмида шавад, ки Президенти Тоҷикистон ба ин низом ҳамчун самти афзалиятноки Барномаи пешазинтихоботии худ диққат дода, таълиму тарбия, ташаккулу камолоти маънавию ҷисмонии ҷавонон, ҳифзи ҳуқуқ ва истифодаи пурсамари неруи зеҳнии онҳо ба манфиати ҷамъият, муносибату корбарӣ бо ҷавонон дар шакл ва сатҳу сифати нав бо назардошти воқеоту таҳаввулоти ҷаҳони муосирро кафолати татбиқи босамари барномаи мазкур медонанд.

Ӯ дар идома гуфт: “Мушаххасан, бо мақсади дастгирии ташаббусҳои ҷавонон дар ҳафт соли оянда ба таври фарогир амалигардонии силсилаи табдирҳо дар назар дошта мешавад. Дар шароити ҷаҳонишавӣ сиёсати давлатии ҷавонон ҳамчун воситаи таъсиррасон дар бартараф намудани монеаю зиддиятҳои ҷойдошта нақши муҳим бозида метавонад. Интизориҳои Ҳукумати ҷумҳурӣ аз ҷавонон бисёр нек ва баланд буда, барои тақвият, ҳавасмандӣ ва дастгирии ин қишри тавонманду зеҳнӣ ҳамарӯза тадбирҳои амалиро роҳандозӣ менамояд”.

Ба таъкиди Илҳомҷон Ҳамидиён, он бандҳое, ки дар Барномаи пешазинтихоботии худ нисбат ба ҷавонон Пешвои муаззами миллат зикр намудаанд, ба маънии идома ёфтани дастгириҳои доимӣ ва минбаъда ба ҷавонон ҳамчун неруи боэътимод ва такягоҳи устувор маънидод мешавад. Раиси муаззами ҲХДТ хуб дарк мекунанд, ки ояндаи давлату миллати мо ба насли ҷавон иртиботи ногусастанӣ дорад, маҳз ҷавонон дар байни дигар табақаҳои аҳолӣ бештар фаъоланд.

Зубайдулло Маҳмадуллозода, сардори Раёсати кор бо ҷавонони Кумитаи кор бо ҷавонон ва варзиши назди Ҳукумати Ҷумҳурии Тоҷикистон мегӯяд, имкониятҳое, ки то ин дам барои ҷавонон аз ҷониби роҳбарияти олии мамлакат фароҳам оварда шуданд, ҷавононро рӯҳбаланду дар ҷодаҳои гуногун фаъол гардонд. Ӯ гуфт: “Шароитҳои то ин дам фароҳамовардашуда, баҳри рушду инкишофи имкониятҳои зеҳнӣ, ҳамчун як шахси комил бо донишҳои замонавӣ мусаллаҳ гардидани насли наврасу ҷавони кишвар мусоидат намуда, дар навбати худ дар замири ҷавонон қобилиятҳои навро кашф ва боварию эътимодашонро ҷиҳати анҷоми корҳои созандагӣ ба маротиб боло бурд. Дастовардҳое, ки ҷавонон дар тӯли истиқлол соҳиб гардиданд, ҳама бо дастгириҳои Пешвои муаззами миллат муҳтарам Эмомалӣ Раҳмон муяссар гардидааст”.

Ба таъкиди Зубайдулло Маҳмадуллозода, нуктаи муҳиме, ки дар Барномаи пешазинтихоботии Президенти тозаинтихоби Тоҷикистон муҳтарам Эмомалӣ Раҳмон дар бахши ҷавонон вобаста ба таҳким бахшидани заминаҳои меъёрии ҳуқуқии соҳа бахшида шудааст, он имконияти дастрасӣ ба масъалаҳои ҷавононро фароҳам меорад. “Барои боз ҳам беҳтару самаранок ба роҳ мондани фаъолияти соҳа ва ҷалби васеи ҷавонон дар ҳаёти сиёсию иқтисодии кишвар дар таҳрири нав қабул намудани Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон”, Консепсияи миллии сиёсати давлатии ҷавонон ва Стратегияи сиёсати давлатии ҷавонон то соли 2030 имконияти дастрасӣ ба масъалаҳои марбут ба ҳаёти ҷавононро фароҳам хоҳад овард. Инчунин қабул ва давра ба давра амалигардонии Барномаҳои давлатӣ дар самти тарбияи ватандӯстӣ ва таҳкими ҳувияти миллии ҷавонон яке аз роҳҳои тарбияи ҷавонон дар рӯҳияи ватандӯстиву баланд бардоштани ҳувияти миллии ҷавонон ба ҳисоб меравад”.

Коршиносон ба ин назаранд, ки зиёд намудани таваҷҷуҳи ҷавонон ба илмомӯзӣ ва бунёд кардани марказҳои инкишофи зеҳнии ҷавонон бо дарназардошти тақвият бахшидан ба эҳсоси ватанпарастӣ, худшиносии миллӣ ва ҷаҳонбинии дунявӣ миёни ҷавонон, боиси он мегарданд, ки ҷавонон боз ҳам фаъол гарданду дар таҳкими ваҳдату ягонагӣ саҳми худро гузоранд.

“Камбудиҳо дар ин самт ҳастанд ва муназзам ислоҳ мешаванд. Ҳарчанд фаъолияти ҷавонон дар ҷомеа муайян бошад ҳам, ба танзим даровардан ва зери механизми ягона ҳамчун унсури ҷузъии як воҳиди кул фаъолият кардани тамоми ташкилотҳои кор бо ҷавонон аз авлавиятҳое маҳсуб меёбанд, ки ба татбиқкунандаи ин сиёсат имтиёзҳои бештар бояд дода шавад, – мегӯяд Илҳомҷон Ҳамидиён. – Боиси таассуф аст, ки дар шароити кунунӣ низоми кор бо ҷавонон дар дигар вазорату идораҳо бо ваколатдори соҳа дар аксар маврид ҳамоҳанг намегардад. Тақвият бахшидани фаъолияти созмонҳои кор бо ҷавонон, аз ҷумла Иттифоқи ҷавонони Тоҷикистон, ташкилотҳои ҷамъиятии “Пайравони Пешвои миллат”, “Созандагони Ватан” дар заминаи тамоми муассисаҳои таълимии кишвар, дастгирии ҳамаҷонибаи фаъолияти волонтёрон ва гирандагони стипендияҳову ғолибони олимпиадаҳои фаннӣ хеле муҳим аст.

Моҳиятан, барномаи Пешвои миллат дар назар дорад, ки ба хотири боз ҳам равнақ бахшидани кор бо ҷавонон дар ҷомеа, ҳалли саривақтии мушкилоти ҷавонон, роҳандозии доимии тадбирҳои амалӣ вобаста ба тақвияти фаъолият ва таъмини иштироки онҳо дар идоракунии сиёсӣ, ҳаёти иҷтимоиву иқтисодӣ, тарбияи ватандӯстӣ ва таҳкими ҳувияти миллӣ дар ниҳоди ҳар як ҷавони кишвар, таъмини шуғлнокии ҷавонон, дарёфт ва дастгирии доимии ҷавонони лаёқатманду соҳибистеъдод ва таъмини ҳифзи ҳуқуқ ва манфиатҳои ҷавонон тадбирҳои амалии саривақтӣ бояд роҳандозӣ шаванд”.

Номбурда ҳамчунин афзуд, ки ҷудо кардани қарзҳои ипотекӣ ба ҷавонон ва олимони ҷавон барои хариди манзил ва ворид намудани тағйиру иловаҳо ба Қонуни Ҷумҳурии Тоҷикистон “Дар бораи ипотека”, тақвият бахшидани корҳои тарбиявӣ бо мақсади пешгирӣ аз вайроншавии оилаҳои ҷавон бо ҷалби аҳли ҷомеа, баланд бардоштани малакаи касбӣ ва ҷалби ҷавонон ба фаъолияти соҳибкорӣ бо мақсади паст кардани сатҳи бекорӣ, мусоидат ҷиҳати иштироки бештари ҷавонон дар ҳаёти сиёсии ҷомеа, баланд бардоштани шавқу ҳаваси хизмати содиқона дар сафи Қувваҳои Мусаллаҳи Ҷумҳурии Тоҷикистон, интихоб ва ҷобаҷогузории кадрҳои ҷавони лаёқатманд ва аз технологияи муосир бархурдор дар зинаҳои роҳбарикунанда, ба роҳ мондани шаклу усулҳои нав ва таъсирбахши муқовимат бо падидаҳои ҷинояткорона, пешгирии шомилшавии ҷавонон ба созмону ҳаракатҳои террористиву экстремистӣ, афзоиш наёфтани омилҳои номатлуб дар байни насли ҷавон ва ғайра бо фарогирии механизми иттилоотонӣ ва пешгирикунанда ҳамчун низоми пайваста мутобиқшаванда ва ба талаботи замони муосир ҷавобгӯ бояд мудом мадди назар бошад. Дар ин самт албатта аз тарафи масъулин корҳои шоиста аллакай анҷом шудаанд ва бояд бомаром идома дода шаванд.

Ба гуфти ҳамсуҳбатон, вақте ки барои ҷавонон чунин иқдомҳои беназир рӯи даст гирифта мешаванд, пас ҷавонон бояд ҳушёру зирак бошанд. Ҳоло дар назди ҷавонон масъалаҳое қарор доранд, ки дарку ҳалли онҳо аз ҷавонони мо дониши амиқ, ҷаҳонбинии замонавӣ ва муҳимтар аз ҳама, ҳисси баланди миллӣ, худогоҳиву худшиносӣ ва самимона дӯст доштани Ватанро талаб менамояд.

Вобаста ба ин Илҳомҷон Ҳамидиён гуфт: “Ҷавонони кишвар бояд набзи ҳаёт ва асри навро ба хубӣ эҳсос кунанд, ҳамқадами асри худ бошанд, талаботи замон ва бозори меҳнатро пайваста эҳсос намоянд, аз дастовардҳои илму техникаи муосир қафо намонанд, онҳоро дар амалия пурсамар истифода карда, аз таҷрибаи пешбурди иқтисоду идоракунӣ воқиф гарданд. Дар меҳвари ин ҳадафҳо бе шак, ҳимояи манфиат, амният ва суботи давлати соҳибистиқлоламон дар раванди бархӯрдҳои ҷаҳонӣ бо иродаи мустаҳкаму ақлу фаросату хирад ва маънавиёти баланд меистад. Яке аз махсусиятҳои таъкиди “зиракии сиёсиро гум накунед”-и Пешвои муаззами миллат ҳамин аст. Манфиати миллат барои ҳар ҷавони тоҷикистонӣ аз ҳамаи манфиатҳои дигар болотар меистад. Инро бояд ҷавонони мо донанд ва хуб дарк кунанд”.

Ин ҳамсуҳбати мо дар хулосаи андешаҳои хеш вобаста Барномаи пешазинтихоботии Президенти тозаинтихоби Ҷумҳурии Тоҷикистон муҳтарам Эмомалӣ Раҳмон афзуд, дар заминаи тақвият бахшидани эҳсоси ватанпарастӣ, худшиносии миллӣ, таҳаммулгароӣ ва ҷаҳонбинии дунявӣ миёни ҷавонон ва роҳандозии чорабиниҳои дигари идеологӣ, ҳал намудани мушкилоти иҷтимоии ҷавонон дар меҳвари барнома қарор дорад.

Хулоса, ба ҷавонон дар тӯли солҳои истиқлол аз ҷониби роҳбарияти олии кишвар таваҷҷуҳи ҳамешагӣ зоҳир гардида, минбаъд низ он идома хоҳад ёфт. Зеро ҳамин гуна тадбирҳои андешидашуда имконият фароҳам овард, то ҷавонони кишвар дар ҳаёти сиёсию иқтисодӣ ва иҷтимоию фарҳангӣ фаъолона иштирок намоянду саҳми худро дар рушди кишвар гузоранд.