734002, Таджикистан, Душанбе ул Спортивная 6 (+992 37) 2351023; 2367815;

Комитет по делам молодежи и спорта при Правительстве Республики Таджикистан

Меню


Нахустфоруми ҷумҳуриявии хизматчиёни ҳарбӣ ва ҷавонони синни даъват

Нахустин маротиба дар кишвар Форуми ҷумҳуриявии хизматчиёни ҳарбӣ ва ҷавонони синни даъватӣ таҳти шиори “Пайравони Пешвои миллатем” дар шаҳри Душанбе баргузор гардид.

Форум бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Вазорати мудофиаи кишвар рӯзи 30 октябри соли 2018 бо иштироки намояндагони Кумитаи кор бо ҷавонон ва варзиш, намояндаи Дастгоҳи иҷроияи Президенти, генералону собиқадорони соҳа, афсарону сарбозон, иштирокчиёни форум, волонтёрон ифтитоҳ шуд.

Субҳи 30 октябр қабл аз кушодашавии қисмати расмии форум бо иштироки намояндагони Кумитаи кор бо ҷавонон ва варзиш ва Вазорати мудофиа дар назди муҷассамаи Исмоили Сомонӣ гулчамбар гузошта шуд.

Қисмати расмии чорабиниро дар толорои бинои марказии Вазорати мудофиа вазири мудофиаи кишвар генерал-полковник Шералӣ Мирзо ифтитоҳ намуда, мақсад аз баргузории форумро тақвият бахшидани донишу малака, таҷрибаи касбии хизматчиёни ҳарбӣ, баланд бардоштани ҳиси худогоҳию ватанпарастии ҷавонон ва ҷалби онҳо ба сафи Қувваҳои Мусаллаҳ арзёбӣ намуд.

Вазири мудофиа дар суханронии худ зикр намуд, ки ғамхориҳои пайваста, таваҷҷуҳи зиёд ва эълон намудани соли 2017 дар кишвар ҳамчун Соли ҷавонон аз сиёсати хирадмандона ва ғамхории Сарвари давлат ва Ҳукумати Тоҷикистон нисбат ба насли ҷавон ба ҳисоб меравад: “Дар шароити ҷаҳонишавӣ қувваҳое ҳастанд, ки аз нерӯи бузурги ҷавонон истифода бурда, онҳоро барои амалӣ намудани ҳадафҳои ғаразноку нопоки худ истифода мебаранд. Барои он ки ҷавонон тақдири ояндаи миллатро ба даст гиранд, Истиқлолияти давлатиро ҳифз карда тавонанд, бояд ифтихори миллӣ ва ҳисси баланди ватандорӣ дошта бошанд. Ба ин мақсад мо бояд корро дар самти тарбияи ватандӯстӣ ва таҳкими ҳувияти миллии ҷавонон ба таври муассир ба роҳ монда, ҳамкориро бо ҷомеаи шаҳрвандӣ, тамоми вазорату кумитаҳо ва ташкилоту созмонҳо боз ҳам тақвият диҳем. Дастуру супоришҳо ва ҳидоятҳои Роҳбари давлат оид ба баланд бардоштани зиракии сиёсии ҷавонон, аз он ҷумла аз афсарону сарбозон талаб мекунад, ки онҳо ба халқу Ватан, ба Прездиенти кишвар, ба савганди ҳарбии худ ва ба хоки муқаддасти Ватан содиқ бошанд ва барои он ҷаонашонро дареғ надоранд,”- гуфт вазири мудофиа.

Шарифзода Фирӯз, намояндаи Дастгоҳи иҷроияи Президенти кишвар Тоҷикистонро аз ҷиҳати аҳолӣ ба яке аз кишварҳои ҷавон маҳсуб дониста, қайд намуд: “Ҷавон будани аҳолӣ нерӯи бузург аст. Ин нерӯи бузурги пешбарандаи ҷомеа аз солҳои аввали истиқлолият ифодагари ифтихори миллӣ ва шукргузор аз истиқлолияти давлат мебошад. Ояндаи давлату миллати мо ба насли ҷавон мансуб буда, онҳо умеду такягоҳи давлат мебошанд. Ҷавонон бояд сазовори боварии Пешвои миллат гашта, саҳми арзандаи худро дар пешрафти соҳаҳои гуногуни Ватани азизамон гузоранд. Дар нигоҳ доштани сулҳу субот ва оромии кишвар саҳм гузоранд. Имрӯз ки нахустин форуми ҷумҳуриявии хизматчиёни ҳарбӣ ва ҷавонони синни даъвати таҳти шиори “Пайравони Пешвои миллатем” баргузор гашта истодааст, бовари комил дорем, ки он барои шиносоии ҷавонон аз ҳаёти воқеии сарбозону афсарон ва баҳри рӯҳбаланд намудани хизматчиёни ҷавон ва ҷавонони синни даъватӣ мусоидат менамояд”.

Раиси Кумитаи кор бо ҷавонон ва варзиши назид Ҳукумати кишвар Аҳтам Абдуллозода баргузории форумро дар марҳилаи сафарбарнамоии ҷавонон ба хизмати модар-Ватан рамзӣ хонда, иброз дошт: “Чорабиниҳое, ки дар форум баргузор мегарданд, дар замири ҳар як иштирокчӣ ҳисси худшиносию худогоҳии миллӣ ва меҳандӯстию ватанпарастиро бедор месозад”.

Раиси Кумитаи ҷавонон ва варзиш дар идомаи баромади худ аз ғамхорӣ ва дастгириҳои ҳамешагии Президенти кишвар баҳри насли ҷавон ёдовар шуда, аз ҷумла чунин гуфт: “Дар системаи давлатдории навини дунё ин қадар меҳру муҳаббате, ки Роҳбари давлат нисбати ҷавонон дорад, маҳз дар Тоҷикистон аст. Таҷрибаи ҷавондӯстдории Пешвои муаззами миллат бесобиқа аст. Ин як шарафи бузург барои ҷавонон аст ва ҳар лаҳзаи онро бояд бо самар истифода намоянду ҳар дам шукргузорӣ аз ин неъмат кунанд”.

Дар фарҷом як қатор иштирокчиёни форум аз ҷониби Вазорати мудофиа ва Кумитаи кор бо ҷавонон ва варзиш бо сипоснома ва ифтихорномаҳо ҳавасманд гардонида шуданд.


01.11.2018 Нет комментариев