734002, Тоҷикистон Душанбе, к. Спортивная 6; (+992 37) 2351023; 2367815;

Кумитаи кор бо ҷавонон ва варзиши назди Ҳукумати Ҷумҳурии Тоҷикистон

Меню


Конститутсия ва ҷавонон: имкониятҳои иштирок дар ҳаёти сиёсӣ

Бо ташаббуси Кумитаи кор бо ҷавонон ва варзиши назди Ҳукумати кишвар, 5-уми ноябр, бахшида ба Рӯзи Конститутсия дар Академияи илмҳои ҷумҳурӣ конференсияи ҷумҳуриявӣ дар мавзӯи “Конститутсия ва ҷавонон: имкониятҳои иштирок дар ҳаёти сиёсӣ” баргузор гардид.

Дар конференсия Аҳмадзода Дилноза, муовини раиси Кумитаи кор бо ҷавонон ва варзиши назди Ҳукумати ҷумҳурӣ ва инчунин намояндагон аз Суди конститутсионӣ, Вазорати маориф ва илм, Академияи илмҳо, Маркази тадқиқоти стратегӣ ва Донишгоҳи миллӣ иштироку суханронӣ намуданд.

Аҳмадзода Дилноза, муовини раиси Кумитаи кор бо ҷавонон ва варзиши назди Ҳукумати ҷумҳурӣ, зимни суханронии хеш дар ибтидо кулли ҳозиринро ба Рӯзи Конститутсия муборакбод гуфта, аз ҷумла қайд намуданд: “Мо аз соли 1994 то инҷониб Рӯзи Конститутсияро бо шукуҳу шаҳомати хосса таҷлил менамоем. Албатта, конститутсияи мо яке аз конститутсияҳои беҳтарине мебошад, ки дар миёни дигар санадҳои меъёрию ҳуқуқии давлатҳои хориҷӣ маҳз бо назардошти дар боби дуюм ҷойгир кардани арзиши олӣ доштани ҳуқуқу озодиҳои инсон ва шаҳрванд ва такяи бештар кардан ба масъалаҳои ҳуқуқу озодиҳои инсон ва шаҳрванд дар ҷомеа, имрӯз ҳамчун конститутсияи беҳтарин ҷойи панҷумро дар миёни тамоми конститутсияҳои олам ишғол намудааст”.

Таъкид гардид, ки бо ворид гардидани таъғйиру иловаҳо ба Конститутсияи кишвар имкониятҳои фарох барои иштироки ҷавонон дар ҳаёти сиёсӣ фароҳам оварда шудааст. Давлати имрӯзаи мо дар роҳи эъмори ҷомеаи демократӣ дар тӯли солҳои истиқлолият ба натиҷаҳои муайян муваффақ гаштааст, ки онҳо дар беҳтаргардонии фазои демократии мамлакат инъикос мегарданд. Яке аз чунин дастовардҳои муҳимро метавон қабули конститутсия номид, ки он дар ҳалли чандин масъалаҳо ва вазифаҳои дар назди худ гузоштаи давлатамон мусоидат намуда, натиҷа ҳамин буд, ки Тоҷикистон дар муддати кӯтоҳ ҳамчун қисми ҷудонашавандаи ҷомеаи ҷаҳонӣ дар арсаи байналмилалӣ пазируфта шуда, айни ҳол зиёда аз 130 давлати дунё расман онро эътироф намудааст.

Зимни баромади хеш иштирокчиёни дигар вобаста ба нақши ин санади тақдирсоз суханронӣ намуда, иброз доштанд, ки дар конститутсияи кишвар, ки 6-уми ноябри соли 1994 ба тариқи раъйпурсии умумихалқӣ, яъне бевосита аз тарафи худи мардум қабул карда шудааст, инсон, ҳуқуқ ва озодиҳои он арзиши олӣ эътироф гардидааст, ки ин падида ба арзишҳои умумибашарӣ ва санадҳои байналмилалӣ, хусусан Эъломияи ҳуқуқи башар такя мекунад.

Сафаралии Далер, яке аз иштирокчиёни конференсия дар мавзӯи “Заминаҳои ҳуқуқии қабули конститутсияи даврони соҳибистиқлолӣ” маъруза намуда, аз ҷумла иброз дошт: “Конститутсия қонуни асосии давлат, унсури марказии низоми ҳуқуқии кишвар, заминаи эҷод ва такмили минбаъдаи қонунгузорӣ ба ҳисоб меравад. Имрӯз конститутсияи Ҷумҳурии Тоҷикистон тамоми ҳуқуқҳо ва имкониятҳоро нисбати ҷавонон дар соҳаҳои сиёсӣ, иқтисодӣ, иҷтимоӣ ва фарҳангӣ муҳайё намудааст. Аз ҷумла, моддаҳои 28 ва 29 конститутсия ба ҷавонон, махсусан ба шаҳрвандони ҷумҳурӣ имконияти озоди иштирок намудан дар ҳаёти сиёсӣ ва идораи давлатиро кафолат медиҳад. Пас, ҷавононро мебояд ки аз ин ҳуқуқҳои кафолатдодаи конститутсия самаранок истифода бурда, дар ҳаёти сиёсӣ ва иқтисодии Ҷумҳурии Тоҷикистон фаъолона иштирок варзанд”.

Бо қаноатмандӣ зикр гардид, ки конститутсия шоҳсутун, бахтномаи миллат ва тақдирсозу имрӯзу фардои давлати Тоҷикистон ва миллати тоҷик маҳсуб меёбад. Ин санади тақдирсоз ҳамчун шаҳодатномаи адолатхоҳу бунёдкор ва ваҳдатталаби Тоҷикистон баромад намуда, маҳсули замони соҳибистиқлолии миллат ва кишвари азизамон мебошад. Конститутсия ҳамчун қонуни асосии кишвар дар такмили шакли идоракунии давлат ва низоми давлатдорӣ, пойдории сулҳу субот, якпорчагии ватан ва осоиши ҳаёти мардум саҳми беандоза дорад. Пешвои миллат доир ба нақши конститутсия гуфтаанд, ки қабули конститутсия дар таърихи навини кишвари мо аз ҷумлаи рӯйдодҳои муҳимтарини сиёсӣ мебошад, ки арзиш ва аҳамияти он бо гузашти замон бештар мегардад.

Дар интиҳои конференсия миёни иштирокчиён ва масъулин суҳбати озод сурат гирифта, ҳар яке вобаста ба нақши калиди доштани санади сарнавиштсози миллат – конститутсия ибрози назар намуданд. Гуфта шуд, ки ҷавонон бояд дар таҳкими ин санади муҳим ва қонуни асосӣ талош намоянду саҳми худро ҳамчун шаҳрвандони фаъоли кишвар дар рушду нумуъи ватани азизамон – Тоҷикистон гузоранд.


08.11.2018 Нет комментариев